20
Ma pos li litt prince hat longmen migrat súper li sand, li roccas e li nive, it evenit que il finalmen decovrit un strada. E omni stradas ducte al homes.
"Bon die", il dit.
Ta esset un florescent jardin de rosieros.
"Bon die", li roses dit.
Li litt prince regardat a ili. Ili omnes similat a su flor.
"Qui vu es?", il questionat les tre astonat.
"Noi es roses", li roses dit.
"Ah!", li litt prince dit.
E il sentit se tre ínfelici. Su flor hat narrat le que it es sur li tot munde li sol de su specie. E vi! Ci esset quin milles de it, omnes identic, in un sol jardin.
Su flor vell esser tre furiosi si it vell vider to. E it vell tussar terribilmen e simular que it vell morir por evitar li risibilitá.
E yo vell dever simular si yo cuida me pri it, nam si ne it vell far que it vermen mori, por ahontar me ...
Tande il dit ancor a se self: Yo credet que yo vell esser rich per un unic rose e yo possede solmen un ordinari flor. It e mi tri vulcanes, queles es solmen tam alt quam mi genú e de queles un es fórsan extintet por sembre, to ne fa ex me un tre grand prince ... E il jettat se in li herbe e plorat.