Politica
Li terminologie social e political es tre different secun li divers landes. Sovent li sam parole have contrari signification e to es li cuase de mult miscomprensiones. Pro to noi vole far un prova de classification eante de dextre a sinistre.
Ye dextre es li conservatives (reactionarios) con li nationalistes (rassistes e fascistes).
Ye li centre es li moderates (liberales).
Ye sinistre es li democrates (in frances : radicales), socialistes (social-democrates), revolutionnari-socialistes e communistes. Tre strangi es li fact que in Britannia e America on nomina « radicales » li partis de extrem-sinistri : socialistes e communistes. In Francia li « radicales » es simplic democrates.
Li « liberales » de Britania es democrates. In Francia li « liberales » es clericales, ma, in contrari, in Belgia, li « liberales » es anticlerical e analog al « radicales » de Francia.
Li social-revolutionarios de Russia es tre moderat e presc reform-socialistes. Apu to li social-revolutionarios de sinistri de Russia es vermen revolucionarios. No cita omni ti exemples por monstrar li desfacilita de classification e quant un inexperimentat traductor posse far mis-traductiones si il ne conosse bon li politica.
In Britania existe li labor-parti, quel es un parti uniant li socialistic e syndicalistic ovreros.
Extra li political partis sta li anarchistes, queles divide se in communist-anarchistes et individualist-anarchistes.
La majorite del social-democratic partis es uniat in li Ovreral Socialistic Internationale (IIesim Internationale). Li Communistic partis es uniat in li Communistic Internationale o IIIesim Internationale (Komintern).
Quelc socialistic partis sta extra li du Internationales e adhere al Buro International del Partis Revolutionari-Socialistic, in Paris.
Li professional organisation del ovreros consiste in syndicates (trade-unions) queles posse esser confesional (religios), sin confession (laic) o men anti-revolutionari. Li majorite del syndicates adhere al Syndical Internationale (Amsterdam) o al Internationale Syndical Rubi (Moskva).
Un tre important movement es ti del cooperativ societes, queles divide se in cooperatives de consumation (consum-uniones) e cooperatives de production.
Conflictes posse evenir inter employantes (patrones) e employates (ovreros) pri conditiones de labor o de salarie. Si un mutual accord ne posse esser fat, li ovreros abandonna li loc de labor (fabricas, magasines, butiques, offices, etc.) Illi refusa laborar e bastamenta till li tempore quande illi obtene satisfaction o es fortiat retornar al labor pos un van lucta. Omni laboreros ne bastamente e tis qui continue li labor durant un bastament es tre despreciat de su companos.
On ha videt que quelc vez, por replicar al bastament li patron clude su fabrica. It es un block-exclusion (lock-out).
Si ne es sufficient labor, li ovreros es desoccupat e choma, illi deveni chomeros. Durant li ultim annus esset grand crises de chomage precipue in Britania e Central Europa. Si li overo es accidentat o vulnerat, il recive un pecunie-auxilie e il es curat per li assecur-companie, o li cassa de assecurantie. In quelc landes existe cassas contra li chomage e li maladie e anc pensiones de oldesse.
Li grand producteros del munde anc es organisat internationalmen per trustes, cartelles, uniones, etc. Li maxim conosset es li cartell del stal e ti del chemicalies. Li organisation del munde deveni sempre plu international, super li frontieres, it es extraordinari que li serios mannes ne apporta un plu grand attention al problema del mundilingue.