Omnicos es bon

NU trovat se null rason fugir mem un passu plu. Li sol quel li du hat timet esset Watho. Ili lassat la ta e retroeat. Un grand nube venit e covrit li sole, e un pesant pluvie comensat cader, e Nycteris trovat se tre refriscat, nu posset vider un poc, e con li auxilie de Photogen marchat suavimen sur li frigidat humid herbe.

Ne hante eat tre lontan ili incontrat Fargu e li altri chassatores. Photogen dit les que il hat mortat un grand rubi lupo, e que it esset Seniora Watho. Li chassatores semblat seriosi, ma li joya trasplendet.

"Alor", dit Fargu, "Yo va ear e sepulter mi mastressa."

Ma quande ili atinget li loc, ili trovat que ella esset ja sepultet – in li ventre de mani avies e besties qui hat fat la lor dejuné.

Tande Fargu, rejuntente se con les, volet tre sagimen que Photogen mey ear al rey por dir le li tot historie. Ma Photogen, mem plu sagi quam Fargu, ne intentet departer til quande il hat maritat Nycteris; "Nam tande", il dit, "li rey self ne posse divider nos; e si existet in li munde du persones inter quel li un ne posse viver sin li altre, it es Nycteris e yo. Ella deve docer me devenir brav in li obscuritá, e yo deve cuidar pri la til quande ella posse tolerar li calore del sole, til quande il auxilia la vider, vice far la ciec."

Ili maritat se li sam die. E li die sequent ili eat junt til li rey e racontat li tot historie. Ma per chance trovat se in li corte li patre e matre de Photogen, ambi in alt favore con li rey e reyessa. Aurora presc morit pro joya, e dit les omni qualmen Watho hat mentit, fante la creder que su infante esset mort.

Nequi savet alquo pri li patre o matre de Nycteris; ma quande Aurora videt in li charmant yuna su propri azur ocules splendente tra li nocte e su nubes, it fat la pensar strangi coses, e marvelar pri qualmen mem li males posse servir quam ligament inter li bones. Tra Watho, li matres, qui nequande ha videt unaltru, hat changeat ocules in su filies.

Li rey dat les li castelle e li terrenes de Watho, e ta ili vivet e docet unaltru durant mult annus queles ne semblat long. Ma mem ante li passada del unesim Nycteris comensat amar li jorne plu, pro que it esset li vestiment e coron de Photogen, e ella videt que li jorne esset plu grand quam li nocte, e li sole plu senioral quam li lune; e Photogen hat comensat amar li nocte plu, pro que it esset li matre e li hem de Nycteris.

"Ma qui save", Nycteris customat dir a Photogen, "que quande anc noi for-ea, forsan anc noi va intrar in un jorne tam plu grandiosi quam tui jorne, quam tui jorne es plu grandiosi quam mi nocte?"