Vesper

DETRA li castelle ascendet subitmen li coline; li turre in li nordest esset advere in contacte con li rocca e comunicat con su interiore. Nam in li rocca trovat se un serie de chambres, conosset solmen a Watho e li unic servitora quem ella fidet, nominat Falca. Un proprietario in témpores passat hat constructet ti chambres sequent li form de ti de un rey egiptian, e probabilmen con li sam dessine, nam in li centre de un ex ili stat alquicos quel solmen posset esser un sarcofago, ma it e altri chambres esset includet per mures. Lor láteres e tegmentes esset ciselat usante bass relief, e pictet in maniere curiosi. Ci li sorciera fat logiar li ciec dama, qui nominat se Vesper. Su ocules esset nigri, con cilies long e nigri; su pelle portat li aspect de argente obscurijat, ma con li max pur tinctura e textura; su capillatura esset nigri, fin e rectmen fluent; su trates esset exquisitmen format, dante un impression minu bell ma plu charmant; ella dat sempre li impression de voler reposar se por nequande plu levar se.

Ella ne savet que ella logiat in un tombe, benque ye vezes ella esset curiosi pro nequande har tuchat un fenestre. Un multitá de sofas, covrit per li max rich seta, tam leni quam su propri guancie, esset preparat por que ella mey reposar se sur les, e li tapisses esset tam spess, que ella vell har posset jettar se self ucunc – convenent a un tombe. Li loc esset sicc e calentat, e astutmen perforat por lassar passar li aere, fante it sempre frisc, mancante solmen li luce del sole. Ta li sorciera nutrit la per lacte, e vin tam obscur quam un carbuncul, e granates, e purpur vinberes, e avies originant ex morassatri locs; e ella fat la audir lugubri aries, e fat lamentosi violines assister la, talmen mantenente la in un atmosfere de dulci tristesse.