Der deutsche Occidentalist

2. Jahrgang № 9 (21) — 1. November 1934

Mitteilungsblatt des Deutschen Occidental-Sprachbundes, Günthersleben Th.

Li provenientie del Germanes in Bohemia

Quam on save, li Germanes in Bohemia sta in un difficil combatte con li ductent nation del tchecoslovakian state. Solmen per firm solidaritá (Sudetendeutsche Heimatsfront!) illi va posser obtener lor natural jures. Li Germanes adver ne posse unionar se statalmen con li conpatriotes in Germania (1919 esset un missuccess!), ma illi posse perducter lor cultural scopes. Durant 1933 illi ha declarat se publicmen por li state Bohemia in su old limites, a quel illi apartene desde li maxim old témpores con omni e egal jures. On mey regrettar hodie, que Bohemia ne ha esset germanisat completmen. Ma it anc es bon por li hodial situation del Germanes, que nequande ha evenit un tal fortiativ colonisation. Noi posse constatar con li historic veritá, que durant li 11. e 12. centennie li ducs resp. reyes de Bohemia e Moravia ha vocat Germanes quam colonisatores ad in lor land, provisat per german jures citeal. Precipue Praha devenit un sede de german mercatores. Alor Bohemia esset un vasall-state del german imperia. Su reyentes esset amicos e parentes del german dynastie del ›Saxones‹. Naturalmen un tal suprematie de Germania super Bohemia ne hat esset attinat sin combatte. Ja ›Charlemagne‹ desde 805 hat postulat tributes fro Bohemia, tande Arnulf de Carintia (Kärnten), Heinrich I., Otto I. Sempre Bohemia ha conservat un cert independentie, e li reyentie del ›Habsburger‹ preferli esset un personalunion con li reyia Bohemia. Quande Bohemia ne ja esset subyugat per li ›Karolinger‹, li du nationes ha tolerat unaltru: in mani regiones li old german population ha conservat se! On ha explorat, que in veritá nequandes li ›Quades‹ e ›Marcomannes‹ ha desapparit o ha esset slavisat till li ultim mann, quande li plupart de tis serchat novi domicilies in li hodial Bavaria (6. centennie) e li tchecos esset inmigrante occupant sin combatte li land. Li Germanes ha tradit les quelc nomines ex li celtic epoca, p. ex. li fluvie-nomines ›Iser‹, ›March‹, li land-nomine ›Mähren‹ (land sur li ›March‹), li monte ›Rip‹ proxim Praha. Altri nomines directmen es old-german o traduction ad in li Slavian, p. ex. Bärn (loc), Schwarzawa (fluvie), Zwittawa (= blanc fluvie), Oskawa (= fluvie con fraxines = Eschenfluß), Vltawa (= Moldau, old-german ›Vilthawa‹ = ›Wildbach‹ = furiosi river.) Per to is es pruvat, que sur li ›March‹ (proxim Brünn e Olmütz), e sur li ›Elbe‹ proxim Praha fort nestes (insules) de Germanes ha conservat se till li hodial die. Ti regiones esset ja in old tempores sin forestes, ergo cultivabil. Li colonisatores del 11. e 12. centennie tande ha extirpat li grand forestes del limit-regiones, quo clarmen demonstra li loc-nomines de ti tempor. Illi accorda con li nomines in li vicini Silesia, Bavaria, Saxonia, Austria, p. ex. Friedland, Reichenberg, Stannern.

Ceterli li unesim reyent del slavian Bohemia esset un franconian (mainfränkischer) mercator, Samo (circa 650). Plu tard noi audi pri 6 ducs, de queles li un esset un germani (Herimann). Li commercial trafic de Bohemia fat se con li regiones del ›Oberpfalz‹, del ›Main‹ e del ›Donau‹. Bohemia debi omni su cultur al Germanes, mem li literatur-lingue a german professores. Lass nos succurser nor german fratres ta!

Walter Karch, Leipzig.