German Occidentalist
№ 3. 1933.
Mitteilungsblatt des Deutschen Occidental-Bundes, Berlin-Bernau.
Propagande, Experienties e consilies.
Dr. Peipers, Köln.
"Ach so, Sie meinen Esperanto ..." To es li stereotypic response, quande on prova interessar alquem por l’idé de mundlingue generalmen e specialmen nostri system. On ne mey colerar; inter cent homes respondent talmen, ne mem un connosse Espo; illi solmen conosse li nomine, li parol Espo, ne li cose self. Illi solmen save que to es li nómine de un system de mundlingue. Un vermen lamentabil resultate de un intensiv propagande de 40 annus! Ma no; yo ha obliviat ancor quelccos: ti propagande ha successat anc suggester al publicum, que Espo es „generalmen diffuset“. Quande vu questiona: esque vu ha videt alquande un commercial lettre in Espo, o un vitrine con l’inscrition „oni parolas Esperanton“? vu va reciver li response: no, ma on ha racontat me que Espo es officialmen instructet in li scoles in mult landes. Ma anc li divulgation de menties e risibil exagerationes es un success tre dubitabil; li Espistes mey creder que ti grand diffusion de lor legendes va auxiliar les quande li Societé del Nationes va decider ... nostri amicos save que anc to es un chimere.
Pro to nostri coidealistes mey ni inquietar-se pro li „successes“ de Espo, ni polemisar contra it. To vell esser un inutil dissipation de nostri forties. Per exemple li Espistes nu fa un grand bruida por lor ho-annual internation. congress in Köln-Cologne; li „Kölnische Illustrierte Zeitung“ ha publicat un articul pri Espo e li congress. Quel va esser li effecte? Quelc dozenes de curios homes va esser seductet ... comensar apprender Espo; ma qui va continuar e perseverar? On save per multannual experienties, que li grand majorité de ti novicios bentost abandona totalmen li cose. In fact li tot Espo-moventie e su success es un illusion, e it ne vale li pena combatter it.
Adver it ne es facil evitar un polemica, justmen pro ti grand divulgation de fals opiniones.
In nostri propagande noi incontra altri impedimentes plu grav quam Espo: intellectual indolentie, manca de activ interesse, prejudicies e ... chovinisme.
Por trovar li maxim apt medies de propagande, noi deve representar nos, in quel maniere li mundlingue va esser introductet. Ta es imaginabil du vias: introduction per li practica, to es in li international correspondenties de int. organisationes, commercial firmas etc.; ti via sembla esser intrabil facilmen por nostri system pro su immediat comprensibilitá. Do ci es un camp de activitá promissent bon success, e noi deve serchar ci li special medies; p.ex.: bon traductiones de commercial textus, reclames, lettres, annuncias; divulgation de nostri folies de propagande e del prospectes de Franckh che li organisationes queles have international relationes.
Li altri via es: interessar li autorités, de queles li final decision va depender, li Societé del Nationes, li ministeries de instruction, li philologos, li instructores etc. In ti direction mult efforties ja es fat; ma ti labore ne es facil, presc omni linguistes have un frisson contra l’idé de un artificial lingue, quel illi conosse solmen in su espistic form. Ma un linguist quel reconosse Occidental quam acceptibil solution del problem, vale plu quam cent mil Espistes. Do: ples demonstrar Occidental al philologos!
In omni casu nostri propagande postula un bon lingual exercitie; noi va tornar nos preferabilmen a homes capabil criticar nos, e coram illi noi deve evitar un mal impression.
Un lingual genie
Till nu li cardinal Mezzofanti posset tener li record in polyglotticitá. Il savet „solmen“ ottant lingues, e un altri polyglott de nor témpore, senior Krebs, conosset plu quam sixant lingues. Krebs esset un alt officiat in li Officie por extran afferes del German guvernament. Il morit quelc mensus ante nu, e su successor es Dr. Tassilo Schultheiß, gymnasial preceptor, qui save plu quam cent e quarant lingues. Schultheiß studiat li max mult lingues per li auxilie del Bible, sin studiar li grammatica. Secun su opinion it es che li apprension de un lingue lu max important, penetrar in li psychic installation del altri pópul. Tande li comprension del grammatica veni de self. Il save sixant europan lingues, inter illi dec germanic, decun romanic, decquin slavic, decun finnic-ugric, decquar semitic lingues, anc Volapük e Esperanto, ma ne Occidental.
N.
Autographie K. Neumann.