Cosmoglotta B 01 (jan-feb-mar 1935)

COSMOGLOTTA-INFORMATIONES

Numeró 1 Januar-Februar-Marte 1935.

Apari durant chascun trimestre quam suplement a Cosmoglotta printat

Redaction e Administration: Occidental-Buró, CHAPELLE (Vaud), Svissia.

Precie de abonnament, junt con Cosmoglotta, por 1935: Fr. 3,50 sviss.

A nor letores!

Alcunes va esser probabilmen astonat reciver un jurnal mimeografat. Noi deve dar les un explication. In ultim témpor, de pluri láteres on ha preocupat se pri li fate de Cosmoglotta, quel, pro li actual desfacil economic circumstanties, suffre un poc pri li crise. On ha proposit restricter li edition printat e dar li Cronica e divers informationes per mimeograf. Specialmen sr. Fritzche de Leipzig in un circulare studiat li maniere passar li témpor de crise economic sin damage.

Li custas de printation de Cosmoglotta in Svissia es li max bass possibil. Noi deve constatar, pos comparation de precies, que on ne posse obtener in altri landes plu bass conditiones. Do on deve lassar li printation in Svissia. Ma sr. Fritzsche proposi:

Un reduction del print-custas va esser possibil si noi prende li resolution printar omni duesim numeró de Cosmoglotta per li mimeograf-machine quel have li Occidental-Buró in Svissia. To vole dir que noi intercala inter omni du numerós tipografat un numeró multigrafat in li maniere del anteyan revúe «Helvetia».

Respondent a ti circulare, sr. E. de Wahl scri:

Anc li idé alternar printat Cosmoglotta con mimeografat numerós es a considerar. Sembla me, que it vell esser bon dar diferent nómines a ti du species pro continual numerós del printat edition. Tande on posse reservar li mimeografat por nor comunicationes al coidealistes, polemicas, intern questiones, etc. i.e. to quo es destinat por li extern propaganda. In li printat edition on vell scrir to quo es destinat por li grand publica e li ancor ne firm coidealistes, do articules de propaganda, clarationes de singul paroles o grammatical formes e íncertitás (quam nu in li «linguistic responses»).

Noi agnoscet que ti propositiones es just. Do, con li aprobation del principal ductores, noi decidet editer in 1935

• 6 numerós de Cosmoglotta sur 16 págines tipografat,
• 4 numerós de Cosmoglotta-Informationes mimeografat,
• 10 numerós por li annu.

Per ti arangeament, noi publica in Cosmoglotta-Informationes li Cronica, li comunicationes del societés national, li adresses, etc. omnicos, quo perdi su valore pos quelc témpore, durant que in Cosmoglotta tipografat noi publica li articules havent un interesse permanent, quo permisse publicar li cadernes por formar un libre ne contenent alquo obsolet.

Li edition tipografat es inviat chascun vez a mult adresses por ganiar nov abonnates.

Li edition mimeografat es inviat solmen al abonnates e al membres del landal societés. A it, noi junte si possibil li circulares e organes del societés national.

Noi peti li responsiv persones del landal organisationes benevoler colaborar con nos por dar nos li necessi informationes concernent lor respectiv land. Li Federationes quel edite folies mimeografat (Svedia, Tchecoslovakia, Francia), reproductet per altri medies (Germania) o mem printat (Anglia) vell posser adjunter lor editiones a Cosmoglotta-Informationes. Tis qui scri lor textus sur matricies, posse inviar nos li matricies; li altris posse inviar li folies printat.

Li format deve esser 210 x 297 mm. (Sam format quam Cosmoglotta-Informationes. Noi besona 300 exemplares. Li textus deve arivar 15 ante li aparition de Cosmoglotta-Informationes -- Ples dar nos li complet adresses del membres de vor associationes. Si possibil, ples scrir les per scri-machine con 4 copies per carbone, sur glutinat paper. To va facilisar nor labor!

SOCIETÉ DE GARANTES POR «COSMOGLOTTA»

Secun proposition de quelc coidealistes, un societé de garantes por assecurar li edition de Cosmoglotta (e Cosmoglotta-Informationes) esset fundat.

Li regulament es includet in li present caderne de Cosmoglotta-Informationes. Noi espera que ti societé va incontrar li general aprobation e que omni coidealistes de quel li situation financial permisse to, va subscrir adminim un parte de Fr. 10.— sviss.

Noi memora que li aquisition de 3 nov abonnates a Cosmoglotta coresponde a un parte del societé de garantes por quel li aquisitor recive li membratu.

Li jure del membres del Societé de garantes es:

a) Reciver duplic abonnament (3 exemplares) si ili expresse ti desire. b) Reciver li contos de Cosmoglotta. c) Expresser al presidente del societé de garantes lor remarcas pri li contos de Cosmoglotta. d) Votar pri important decisiones concernent Cosmoglotta.

Li payament de chascun parte de Fr. 10.— sviss da li jure de un voce por li votationes.

Li nómine del subscritores es publicat in Cosmoglotta-Informationes.

Vi li unesim liste de subscritores:

[cols=«<,<,>»] |=== | Subscritor | Subscritiones | Fr.

| Ric Berger, Morges (Svissia) | 1, 2, 3, 4, 5 | 50.— | Fred Lagnel, Chapelle (Svissia) | 6, 7, 8, 9, 10 | 50.— | Josef Svec, Praha (Tchecoslovakia) | 11, 12 | 20.— | L.M. de Guesnet, Paris (Francia) | 13, 14 | 20.— | Gerald A. Moore, London (Anglia) | 15, 16, 17 | 30.— | Ed. Mayor, Lausanne (Svissia) | 18 | 10.— | G. Bohin, Housséville (Francia) | 19 | 10.— | G. Prinz, Bernburg (Germania) | 20 | 10.— | Major Tanner, Bern (Svissia) | 21 | 10.— | Willy Mildebrath, Bernau (Germania) | 22, 23 | 20.— | Ilmari Federn, Köbenhavn (Dania) | 24 | 10.— | C.W.v. Sydov, Lund (Svedia) | 25, 26 | 20.— | M.A. Fritzsche, Leipzig (Germania) | 27 | 10.— | Pastor Erhard, Karlstad (Svedia) | 28 | 10.— | B. Blomé, Kristinehamn (Svedia) | 29 | 10.— | A. Haldin, Eskilstuna (Svedia) | 30 | 10.— | E. Berggren, Stockholm (Svedia) | 31 | 10.— | Osk. Dillén, Stockholm (Svedia) | 32 | 10.— | Ing. Lindström, Enskede (Svedia) | 33 | 10.— | Red. Lindholm, Stockholm (Svedia) | 34 | 10.— | C.E. Sjöstedt, Ostersund (Svedia) | 35 | 10.— | Yngve Sköld, Stockholm (Svedia) | 36 | 10.— | M. Guilbert, Paris (Francia) | 37 | 10.— | Summa | | 370.— |===

Noi calidmen mersia omni subscritores! Tis qui ja payat lor abonnament posse, por devenir garante, inviar nos li diferentie inter Fr. 3,50 e Fr. 10.— o Fr. 7.— e Fr. 10.—. Qui va ancor alongar nor liste?

Li insigne de Occidental

Pos que li articul aparit in Cosmoglotta, noi recivet ancor li sequent propositiones. Noi peti nor letores queles have un bon idé, continuar li discussion ante votation general.

Sr. Berggren de Stockholm proposi:

«Si nequel apt figura es presentat, noi tot simplicmen deve far fabricar emblemas secun li proposition de Union: Ergo:»

Propositiones de sr. E. de Wahl:

{bracket}Occidental(idental) L(ingue) I(nternat.) A(uxiliari)]

Sr. Akerman de London scri:

Yo proposi que li insigne de Occidental mey esser un pentacle (o pentagramm -- 5-puntes stelle) in aure sur blanc funde.

Ti figura es extremmen antiqui quam magic talisman. In modern dies it ha esset adoptet sur national flaggas, p.ex. de Chile, Cuba, Egiptia, Liberia, Turkia, Unit States, etc., e omnes conosse li «White Star Line». Talmen it have quasi un caráctere international. Támen yo ne memora un tal stelle de aurin colore.

Li facte que Esperanto usa un verdi pentacle vell esser bon simbolisme. Noi vell agnoscer it quam li unesim passu vers un natural sistema. Li verde de it posse representar li verne, durant que li aure es li matur fructification.

On posse adjunter li parol Lingue International e Occidental per micri lítteres. O simplicmen L.I. in li superiori spacies e Occidental in li inferiori spacie; to vell far possibil question e response pri li signification del lítteres.

Li aurin efecte es facilmen printat per bronzin incre, o pictet, altrimen per un masse de micri puntes, secun li convention de heraldica. Comprensibilmen por li buton-insignes noi vell usar real aure.

Sr. Ferd. Haller de Meiringen scri:

Yo es contra li adoption del tilde in nor emblema, pro que it da un insigne poc decorativ e ínsignificant.

Mult plu simpatic es me li proposit insigne nr. 2 (in Cosmoglotta), to es li sole «occidente se» (= ob-cidente, ex latin: ob-cade = cader vers o contra li horizonte) in li mare. Nam ti insigne es interpretativ e simbolic. Li sole, per su position inclinant indica vers li occidente, de quel li lingues (=radies) del sole es partú li sam in li universe, quam ya anc Occidental va esser e vole esser li sam lingue parlat partú sur li globe. Anc li tilde, per li undes del mare, es representat in it. Pro to yo proposi votar por li adoption del sole por emblema secun li nr. 2 in Cosmoglotta o li nr. 1 o 2, du variantes esquissat de me.

Anc li planiglobe de sr. den Outer plese me mult, e si on es contra li selection del «sole sur li mare», yo vell preferer ti emblema o li variante nr. 3. It vell dar anc un decorativ, sat simplic insigne, li dessine nigri sur yelb funde.

Un bell motive por nor insigne vell dar ancor li esquisse sur li covriment del libre «Occidental, die Weltsprache», to es, li conturas de Europa o del Occidente. Per li figura 4 yo intentet animar qualmen on posse adaptar li conturas a un insigne.

Revuante ancor un vez mi esquisses, yo deve confesser, que mi preferentie apartene ante omnicos al «sole» e al «planiglobe»; e li vor?

Sr. C. Varela, Figueras (Hispania) proposi:

Sr. Weinberg (Franca) developa su proposition: un schematisation del arc-in-ciel. Il scri que li arc-in-ciel es un signe de alliantie inter Deo e li homes. On posse anc considerar que li 7 colores del arc-in-ciel es comparabil al 7 lingues principal quel Occidental vole reunir in un sol.

On remarca que li arc-in-ciel oferta un multitá de realisationes e que it have li avantage permisser al diferent gustes exercir se sin forjettar li simbol quel es in li base.

Si pro rasones tecnic li 7 colores del arc-in-ciel ne posse esser printat, sr. Weinberg proposi representar li arc per tri colores fundamental rubi, blu, yelb, e in libres printat in nigri, vice ti tri colores, on posse representar tri stries con li monogramme LI in un angul.

Sr. A. Lindström de Svedia, presidente del societé Occidental, Stockholm, scri:

Li question pri un emblema por Occidental ha ocupat me durant pluri annus. Mi unesim projecte esset ti quel es monstrat in li Nr. 92 de Cosmoglotta, fig. 3. Yo tamen strax trovat it tro complicat e provat in mult manieres simplificar it. Pos mult provas, yo haltat ye li opinion que li simplic líttere «O» con apti fund vell esser li max bon. Yo imaginat me un circul con sett cordes de un comun punctu del periferie e in ti figura un fortios «O» inscrit.

Mi postulation por un emblema es: 1) Pro practic cause it deve esser rond. 2) Tam simplic quam possibil. 3) Null textu. 4) Totmen geometric, por impedir fals formes. 5) Bon visibil. 6) Bellitá.

Mi ultim projecte cade sur punctu 5. Li proposition del centrale de Vienna sembla me esser un bon solution, ma esque li form del unde va esser líber? Yo persiste ye mi quaresim punctu, que li form in li detallies deve esser fixat. Ye li permission del redactor yo monstra du casus por formes de unde. It sembla que li form del fig. 2 es plu bell quam li unesim.

In fine quelc paroles pri li colores. Sur printates li emblema es nigri sur blanc funde. In altri casus solmen aure es suficent representar li idé Occidental. Li proposit yelb colore quam funde ne plese al nordanes. Li colore es bon e practic sur tabules por automobilistes, posit ye cruce-vias, ma desbell por Occidental-emblema.

Yo proposi li emblema sin funde. Lass nos usar it transparent, e in tal maniere it es apt quam broches, cravatt-agullies o pingles sur li vestimentes.

Li max mult de nos occidentalistes forsan es povri, ma un sol ornament noi certmen posse aquisiter, li occidental-emblema de aure.

Li supra expresset opiniones, noi consenti, ma desira que li metall del emblema mey esser argente o facultativ.

E. Berggren -- Anteyan administrator de Cosmoglotta

H. Lindholm. -- Secr. de Societé Occidental, Stockholm.

Redaction de Cosmoglotta

Li redactor ha studiat con grand interesse li divers criticas e suggestiones pri li labor de redaction. Naturalmen, it es impossibil contentar omnes nam li gustes es tro diferent.

Noi agnosce que li part linguistic esset un poc tro extendet. Pro to quam on va constatar it ho-annu, li articules de polemic contra altri lingues va esser minu extendet. Tamen, it ha semblat nos e it ancor sembla nos que nor unesim deventie es documentar li propagandistes e monstrar les pro quo nor lingue es superior al altri projectes.

Alcunes ha proposit publicar resumates de articules aparient in li national lingues, quam fa li revúe Auslese in Germania. Ma esque li letores desira releer in Occidental quo ili ha ja leet in lor jurnal local? Ante omnicos ili desira leer quo es ancor ínedit, nov e ínconosset. Pro to, noi besona original articules e ne solmen traductiones de articules quel ha ja circulat in li tot presse national.

Noi recive quelcvez articules de coidealistes, ma regretabilmen tro long e ne sempre interessant. Li grand criterie por nos es: publicar solmen interessant articules.

Noi exhorta do nor corespondentes inviar nos curt articules (ne plu quam 100 lineas) ma sempre altmen interessant, vivid, passionant.

Sr. Tailliez, de Metz scri nos li 3 januar 1935:

Yo anc deve dir vos que li tre vivent historie de august in Cosmoglotta Un drama in li station, de Keyser (con li horrific figura) ha havet ci un tre grand successe: yo ha fat leer it a pluri persones quel esset astonat del claritá del raconta. Mult melior: por li ultim classe del trimestre, yo leet it in classe, yo self, in Occidental, e, juxta me, mi melior litt traductor de latin traductet it al tot classe quel sovente ha ja comprendet tot ante su traduction. It havet un enorm successe. Si vu posse dar nos sovente racontas de ti qualitá narrativ e stilistic!

Sr Tailliez regreta solmen alcun figuras de nuditás, quel impedi li revúe esser monstrat a infantes. Ti remarca es just e in futur noi va evitar les, anc sur li covriment.

Ma li linguistic rubrica es ancor demandat. Por exemple, sr. Švec de Praha scri nos:

Esque it ne vell esser bon inserter anc un lingual rubrica in Cosmoglotta? Sovente on hesita e ne save pro manca de vocabularium, quel form o expression es just. In tal casus un lingual rubrica, bon redactet, vell dar information.

In su circulare del 16 decembre 1934, sr. Fritzsche de Leipzig da mult suggestiones pri li maniere diffuser Cosmoglotta in omni circules. Ti idés ne es omni realisabil, principalmen ti concernent li kioskes. Noi ja mult ha experimentat e constatat que in practica, li afere ne es tam facil. Tamen noi va provar divers ex su suggestiones.

Fotogrammas

Noi possede li fotogrammas de sr. Quensel, Federn e Akerman. Ma por ne changear li budgete de Cosmoglotta, noi peti li portretates benevoler rimborsar al administration li custa del cliché, to es Fr. 6.— sviss e li cliché va esser donat a ili pos printation in Cosmoglotta. Li redaction es sempre grat al coidealistes quel accepte talmen augmentar li interesse de nor revúe, permissente li membres de nor grand familie conosser unaltru malgré li distanties.

Stampes

Occidentalistes, ples comendar modic stampes che dan firma quel favorisa Occidental. Ples comunicar demandas a: Occidental-Information, Aaboulevard 3, Köbenhavn-V, Dania.

Annu-colectiones de Cosmoglotta

Li administration exchangea ancian numerós de Cosmoglotta 1927 e 1928 e Kosmoglott contra Nr. de 1929-1934. HELVETIA. Annu-colectiones 1929, 1930, 1931, 1932, e 1933 custa Fr. 12.— sviss.

Nov editiones

Noi es informat que pluri libres es in preparation in divers landes: In ANGLIA, un grammatica in anglés; in DANIA, sr. Federn elabora un complet lexico de Occidental quel ja es in parte redactet; in SVEDIA, on elabora li Sved-Occidental lexico; in SVISSIA, sr. Ritter just perfini un grammatica italian, quel va esser printat con li apoy del Occidental-Buró de Chapelle. In FINLAND, sr. Tattari va editer un libre de aprension por Finlandeses. In JAPAN on anc prepara un librette pri Occidental.

Noi peti omni autores atender ancor quelc témpor por li edition, nam CELIA just fini su exploration pri li mollat lítteres. Li resultates del votation va esser publicat sive in Cosmoglotta sive in Cosmoglotta-Informationes.

Congresse 1935?

Cosmoglotta Nr. 99 anunciat li proposition del gruppe de Vienna organisar li 1-im congresse in ti cité in 1935. Ma poy arivat oposition de pluri láteres, principalmen del Germanes quel ne posse partiprender pro li taxe de 1000 RM imposit a omni viagero eant a Austria. Si li duesim congresse va evenir in Svissia, li Svissianes va renunciar a ti de Vienna. Li question va do dever esser studiat. Nor letores va esser informat strax pos un decision del Senat del Occidental-Union.

Cronica

Anglia

In li grand jurnal «Morning Post», sr. G.A. Moore pos har monstrat li principies de Occidental fini per ti atestation:

I would add that I am an old hand at the Interlanguage game, having passed successively through Volapük, Esperanto, Idiom Neutral and Ido; and have at last found peace and quiet in Professor de WAhl's «Occidental».

Nov adresse: Noi informa nor coidealistes que li secretario de «The Interlanguage of Great Britain» es nu:

Sr. E. Biddle, 9 Durban Avenue, Christleton, CHESTER.

Nov postchec-conto: Por li payament de Cosmoglotta e de omni lítteratura, li Occidental-Buró, Chapelle (Vaud), Switzerland apertet sub ti nómine un postchec-conto in Anglia: LONDON S.B.D. Nr. 18 363.

Austria

Li Mitteilungen de Hoerbiger-Institut, in su numeró de januar 1935, publica un articul propagativ por Occidental. Ti «Mitteilungens», quel es redactet de sr. E. Pigal, director del Central Oficie del Occidental-Union, oferta ad ultra alt interessant articules pri astronomie e geologie. Noi recomanda vividmen ti revúe a omni coidealistes (Adresse: Ehamgasse 40, Wien XI). Precie por 3 successiv cadernes: 8 öS.

Li principal articules es sequet de un resumate in Occidental. Ti publication constitue do li unesim prova de penetration de nor lingue in li scientific circules.

Brasil

Un Esperantist de Rio de Janeiro traductet pluri documentes de propaganda por Occidental in lingue portugales e distribuet it al conosset interlinguistes.

Francia

Pro que li adresse de sr. de Guesnet ne plu es citat in Cosmoglotta, alcunes credet que nor amico desertet! To es un erra. Sr. de Guesnet es sempre activ e devoet. Si li Buró de Chapelle, apertet in chec-conto in Francia, it es pro li comoditá del payamentes. Tamen, sr. de Guesnet informa li membres frances que ili posse sempre payar al sequent adresse: L.M. de Guesnet, 83 Rue Rochecouart, PARIS 9-e

Postchec-conto: PARIS 26 437.

Un articul propagativ pri Occidental, scrit de sr. Gilbert W., aparit in «La Dépêche du Centre», li 11 nov. 1934.

Li Association Proletari Interlinguistic, quel propaga Occidental in socialistic circules, publicat un folie volant in quel it da su statutes e exposi li principies de nor lingue. Por omni informationes pri A.P.I. adressar se a: G. Poujet, ISLES s/Suippe (Marne), Francia.

Germania

«Der Deutsche Occidentalist» publicat in su numerós del 1 novembre, del 15 novembre e del 1 decembre un important studie pri li terminologie del «chac lude» e «li provenientie del Germanes in Bohemia».

Adresse: J. Quensel, GUNTHERSLEBEN über Gotha, Germania.

Svedia

Noi recive sempre li circulares mensual del Svenska Occidental-Förbundets. Noi solmen regreta ne posser comprender les pro que ili es redactet in sved lingue. Li numeró de novembre 1934 publicat li statutes del Societé. Li numeró de januar esset consacrat al necessi informationes concernent li reabonnament a Cosmoglotta e li participation al societé de garantes. Nor sincer mersís!

Svissia

Durant octobre mult jurnales del quar lingues national raportat pri li ultim reunion del Sviss Association por Occidental, indicante li composition del Comité del Association.

Tchecoslovakia

Du grand jurnales publica ho-témpor un curs de Occidental, redactet de nor activ colaboratores Svec e Podobsky.

-- Sr. J. Podobsky ha finit li manuscrit del nov tchec libre «Occidental dřuha řec pro všecký» (Occidental, li secund lingue por omnes), quel va contener li historic evolution del idé in concis explication, curt grammatica, prov-textus, liste de litteratura e informationes pri Occidental-movement e organisation.

-- On prepara li edition de vocabularium Occidental-Tchec e Tchec-Occidental.

-- Li 13 februar 1935 esset inaugurat li CLUB OCCIDENTAL de Praha, presidet de sr. Dr. K. Stastny, Dvorakova 27, PRAHA. Noi recivet li sequent lettre:

Al seniores del redaction e administration de Cosmoglotta,

Ye li ocasion del oficial constitution del CLUB Occidental in Praha, li subsignat assistentes del assemblé constitutiv prende li libertá, presentar vos e a omni sviss coidealistes li max sinceri salutationes junt con desires de bon successe de nor bell lingue Occidental.

Vor sempre devoet,

(Signat) Karel Stastny, A. Stastnà, M. Svecova, H. Malousek, J. Svec, J. Huberg (?)

Cordial mersís a nor coidealistes e bon successes!

-- Articules in jurnales. Noi dismisset un noticie pri nor movement a circa 100 jurnales tchec e ultra to, yo dat 30 exemplares a li oficial Tchecoslovac Buro de Pressa, quel liverat ti information a omni grand jurnales tchec. Noi ne posse controlar, esque li noticie esset in omni jurnales publicat, ma secun quo noi posset controlar, noi videt, que pluri jurnales insertet it. Noi recivet un demanda de information del jurnal «Poledni List». Noi dat al redactor quelc printages e li 14 octobre li dit jurnal publicat un grand articul redactional pri Occidental. Regretabilmen, il atacca Esperanto tre vehementmen, ma to es ya su personal vis-punctu! Pro que ti jurnal have adminim 100 000 e mem plu mult letores, it sembla, que ti articul adminim va far atenter a nor lingue. Un altri jurnal tchec, tre expandet, organ del partise socialistic in Tchecoslovakia, «Ceské Slovo» (Li Parol Tchec) insertet un curt articul pri Occidental.

-- Noi joya dar apart li textu del 1-im numeró del OCCIDENTAL-BULLETIN, mensual, redactet de sr. J. Svec, Skroupova, PRAHA VII, Tchecoslovakia.

Servicie de librería (Nov precies desde li 15 marte 1935)

Occidental, die Weltsprache, brochat Fr. 3.—; ligat Fr. 4.50

Radicarium directiv Fr. 2.50

Wörterbuch Deutsch-Occidental Fr. 2.50

Micri Chrestomatie Fr. 1.50

Ti precies es afrancat, do sin augmentation por li postal expenses.

Un rabatte de 10% es dat a omni persones quel compra litteratura por adminim Fr. 10.— sviss. Li rabatte ne es dat por li abonnament por Cosmoglotta ni sur li ancian colectiones de COSMOGLOTTA.

Li payament deve esser fat in sam témpor quam li comende. Li maxim simplic es far li comende sur li cupon de nor postchec-contos (por Francia, Germania o Svissia) o del mandat international. To simplifica nor labores: li expedition es fat ye li reception del pecunie.

Por Anglia e USA e landes u ne existe li mandat international, ples far li comende apart per postcarte, con just indication del adresse.

Postchec-contos: ANGLIA: LONDON S.B.D. Nr, 18 363. FRANCIA: Paris 1765 46. GERMANIA: Berlin 1683 36. SVISSIA: II.1969.

Occidental-Buró, CHAPELLE (Vaud) SVISSIA.

LETTRE-BUX: Sr. e Sra. Dr. Nidecker, Basel inviat lor bon desiras de nov annu per un maniere original: un curt cante in german e Occidental, nominat: «Canon 1935». Cordial mersí!

Complet lexico de Occidental

Sr. I. Federn, Copenhag, scri nos:

Tre probabilmen it va esser redactet tal, que por li mill max frequent paroles (secun Graber in «Occidental, die Weltsprache») noi da traduction in mult lingues, e por li rest noi da definitiones in Occidental self.

Li liste ja esset finit in januar. Nu noi comensa li manuscrite definitiv quel noi pensa terminar in li curs de 1935.

Al professores, instructores, docentes, etc.

Noi remarcat que li Occidental-movement comprende precipue docentes in su majorité. Ti fact es tre injoyant pro que Occidental trova in ili su max bon defensores e su max bon propagatores. In ultra li docentes have continual relationes con li yunesse, quel, secun nos, deve esser li prim interessat a nor movement: it have ne solmen idealisme, ma li fide, li devotion, li tenacitá quel es necessi al difusion de un movement quam li nor.

Pro to, noi opine que noi deve ja nu pensar pri un organisation international del docentes.

Secun nor opinion, noi crede que li via a sequer es:

1. Li edition de un revúe pedagogic contenent precipue articules cultural, articules concernent li metodes de docentie, li reserches pedagogic in li divers landes e anc abundant informationes. Per ti ultim punctu, noi vide precipue li medie interessar li landal pedagogic revúes a nor movement.

2. Li fundation in futur de un organisation international de docentes. Per ti-ci, mult practic realisationes vell esser organisat: corespondentie inter scoleros, exchanges de scoleros, viages de studie por docentes tra li munde, etc., etc.. Li possibilitás practic es ínnumerabil!

SI NOR PROJECTE INCONTRA SUFICENT INTERESSE, li realisation del unesim punctu vell posser JA NU comensar: Noi vell posser adjunter in comense un mimeografat parte in Cosmoglotta-Informationes. Si it have successe, un tipografat revúe va esser editet.

Noi invita instantmen omni nor letores quel have interesse o suggestiones pri nor projecte benevoler strax interrelater con li Occidental-Buró de Chapelle. Lg.

GERMAN-OCCIDENTAL FEDERATION: J. Quensel, GUNTHERSLEBEN ü/GOTHA. GERMANIA

Mediation de corespondentie!

Esque vu conosse, in fact, homes qui nomina se chac-lusores -- ma ili ne lude chac? O esque vu ama tis qui lude cartes solmen quam... spectatores?!

Coidealistes, tamen li situation de Occidental, in cert mode, es ancor conform a un match de football: 2 x 11 fa li currida e li lucte e 11 000 exhorta e aplauda quam spectatores...

Ma li nov sport-movement comensa hodie ja detornar se de un tal monoton particularitá. Solmen 5 000 spectatores -- li altri curre nu self, gimnastica, jetta li disco o salta trans hagaturas, in curt: ili practica self li sport!

E nu, solmen realisar lu sam che OCCIDENTAL! Vu questiona in qual maniere. Noi responde: PER CORESPONDENTIE. Adminim por omni coidealistes qui domicilia isolat.

Fro li German Occidental-Federation yo porosi ti maniere certmen interessant e sufficentmen animant al USA de Occidental.

Qui vole participar misse strax su complet adresse al signator de infra. Ti invia poy al unesim un lettre pri un neutral tema actual. Li destinatario lee ne solmen, ma adjunte su propri pensas. Li duesim recive li lettre, il acte egalmen. Quam li duesim fa li triesim, tam li quaresim e omni sequentes. Chascun lee e scri! Li ultim rendi li plu o min completat «brochura» al expeditor e li circulare ea li via «da capo», ma circummisset es solmen li materiale nov por li proxim.

Noi posse comensar sin retarde, HODIE!

Noi besona solmen vor complesent declaration, car coidealist!

Por ne peccar contra li comun custom noi comensa parlar pri li -- tempe. Li prim tema es do «HIVERNE». Noi demanda vor aventuras hivernal de omni species desde vor yunesse til li unesim albi capilles... (mey noi devenir totmen yun). Adplu vu mey notar vor reflexiones serios e esperantios queles productet in vos li albi campania... durant ski-tures, chasses, slitt-excursiones o anc al camine. (Ergo, strax comensar vor amusant sketch!) -- O esque vu have observationes scientific o tal opiniones pri li tema? O vu vole traducter alquicos? Omnicos es apt, exceptet solmen... ínutil e minutios critica. Vu es convocat al colaboration, a un colaboration quel forsan posse esser FRUCTUOS anc por revúe COSMOGLOTTA!

Temas por plu tard:

1. Ad u yo desira viagear?

2. Pro quo yo ama mi profession omnidial.

3. Yo recivet li unesim premie del loteríe! Quo far, yo -- povre?? (Ya, vu conosse certmen trist racontas pri tal povres, vermen «povres»...)

Directiones detalliat recive omni participantes in lettres.

Car coidealistes, vu ama Occidental: ples do prender ti engageament!

J. Quensel, G.O.F., GUNTHERSLEBEN über Gotha, GERMANIA.

Nov adresses o postchec-contos

TCHECOSLOVAKIA: Noi peti nor coidealistes de Tchecoslovakia inviar lor abonnament a Cosmoglotta a:

J. Svec, 2 Skroupova, PRAHA-VII (Postchec-conto: Praha Nr. 9 438)

SVEDIA: Nor sved abonnates posse payar lor abonnament a Cosmoglotta al postchec-conto del «Sved Occidental-Federation», Box 171, STOCKHOLM Nr. 70 315. (Ples atenter ti nov numeró!)

ANGLIA: Por facilmen payar abonnamentes o comendes de litteratura, ples inviar li summas a nor postchec-conto: LONDON S.B.D. Nr. 18 363, con li sequent adresse: Occidental-Buró, CHAPELLE (Vaud), Switzerland.

Annu 1. Praha, li 1 februar 1935. Numeró 1.

A nor letores!

Til nu li Buró de Occidental in Praha per circulares informat nor amicos pri li Occidental-movement in Tchecoslovakia. Ti circulares trovat un bon acceptation che nor amicos e nor Buró de Occidental recivet mult lettres aprobativ. Por posser plu regularimen informar nor adherentes, por esser in permanent contacte con ili e -- precipue -- por lucrar li bass taxes postal valid por jurnales, noi decidet editer un gazette. «Occidental-Bulletin».

Un tre modest gazette, in fact. Ma omni comensa es desfacil. Quo va devenir nor Bulletin in li futur, to va depender de vos, de vor apoy moral e financial...

Noi deve accentuar ci, que nor bulletin es destinat solmen al information de nor tchecoslovac coidealistes e al propaganda de Occidental in Tchecoslovakia. Noi have null pretensiones devenir un jurnal litterari. To significa, que it ne va esser possibil publicar in nor Bulletin articules de bell prosa, poemes etc. Ma noi va publicar sempre con joy curt articules de nor coidealistes, informant pri li labor fat e particularimen pri li successes atinget. Ti ultim genre de informationes es li max desirabil por nos! Ergo, al labor, al success! Li redaction

Nota del administration.

Li abonnament a nor Occidental-Bulletin va custar necos. -- Chascun interessate va reciver it gratuitmen, regularimen chascun mensu, con exception de julí e august. Ma noi peti omni nor amicos, prender li crayon e calcular un pac, quel expenses noi have a far: Li paper, li printería, li postal expenses, li covertes etc. Noi paya omni ti expenses ex nor propri tasca. Ergo, si vu trova just, que noi omnis deve contribuer al difusion de Occidental, ples ne obliviar nor bulletin in vor budgete e misser nos quelc subvention secun vor possibilitá e vor porta-moné.

Micri Chrestomathie

Referat pri li 1 numeró de nor BIBLIOTECA IN OCCIDENTAL ha publicat sequent jurnales: NÁRODNÍ OSVOBOZENÍ li 9 januar / nro 7 /, NYMBURSKÉ LISTY li 16 januar / nro 3 / e MLADOBOLESLAVSKÉ LISTY li 26 januar / nro 7 /. Qui ne possede ancor ti excellent libre, ples comendar it strax. Pd.

Fine de polemica con esperantistes.

MLADOBOLESLAVESKÉ LISTY in su numeró 2 del 12 januar publicat in articul «Druhy konec» / Li secund fine / de c. Podobsky, per quel il cludet li polemica con sr. Solc. In ti articul c. Podobsky emfasat que Occidental ne es alquel reformat Esperanto, ma un lingue totalmen diferent, constructet sur altri principies quam Esperanto. Il demonstrat li naturalitá de Occidental per comparation del esp. parol «humaneco» con Occidental «humanitá» e publicat comparativ textus de Occidental e Esperanto. Li printería omisset esp. circumflexes, pro que it ne possede les.

PRAGER ABENDBLATT.

Li jurnal quotidian de Praha, publicat in su numeró 10 del 12 januar un articul de c. Kolar «Was ist Occidental» (Quo es Occidental?). In ti articul, pos un introduction historic, c. Kolar accentua li internationalitá del vocabularium de Occidental e su facilitá por chascun educat hom. C. Kolar recivet mult demandas de informationes e noi posse solmen gratular le e desirar mult success a su Central Propaganda-Buró por li german regiones de Tchecoslovakia in Nyrsko / Neuern / 10.

DER KOHLENINTERESSENT.

Organ zur Förderung der Interessen des nordwestböhmischen Braunkohlenbeckens, ferner für Volkswirtschaft, Handel und Verkehr / in su numeró 1 / 5 januar 1935 / del 55-esim annu-colection publicat in li rubrica «Litteratura» un referate de sr. ing. Julius Bauer pri Occidental, in quel il raporta pri nor circulares e lauda, «li bell entusiasme por li afere» Pd.

Curs de Occidental.

Occidental-Club de Nyrsko / Neuern / va arangear un curs de Occidental. Li unesim lecion va evenir li 1 februar 1935. Til nu adheret 8 persones. Guida c. Rudo Kolár. Noi desira mult success a nor agil coidealistes in Nyrsko! rK.

L.P.O. -- Liga del propagatores de Occidental.

Con joy noi publica li nómines del unesim honor-membres de L.P.O. queles recrutat adminim 5 nov adherentes:

1. Jan A. Kajš, Brno; -- 2. Rudo Kolar, Nyrsko; -- 3. J. Cordonnier. Noi mersía sincerimen a ti fervent coidealistes e peti les continuar ínfatigabilmen lor labor! Ad avan! In li labor por li difusion de Occidental! Pd.

2-esim numeró del BIBLIOTECA DE OCCIDENTAL.

Bentost va aparir li 2 nró de nor biblioteca, editet de sr. J. A. Kays. Li nov tome va contener un colection de original poemas in Occidental de sr. Jar. Podobsky sub li titul: LI ASTRES DE VERNE. Ti unesim colection de ecc.(?) poemas, dedicat al autor de Occidental, sr. prof. Edgar de Wahl, va esser equipat per du linoleo-gravuras de sr. prof. Ric.Berger. On posse comendar it ja nu.

Li quaresim reunion de occidentalistes in Praha evenit li 16 januar 1935. Ulteriori salutationes venit de sres. redactor Musil, Boskovice, sr. Quensel, Günthersleben e c. Kolár, Nyrsko. Noi mersía pro ti manifestationes de simpaties e repeti li salutationes cordialmen. Li reunion decidet, convocar li assemblé constituent del CLUB OCCIDENTAL in Praha por li 13 februar 1935 in li café «U Nováku», ye clocca ott vésp. Noi peti omni nor amicos in Praha, visitar ti assemblé constituent. C.O.

Cassa de propaganda.

Noi atesta har recivet li sequent subventiones: Malousek, Praha, Kc 6.—, Svecová, Praha: Kc 6.—, Ex Jicín: Kc 17.—, Dr. Stastny, Praha: Kc 2.—. In summa / januar / Kc 31.—. Summa total til hodie: Kc 238.80. Cordialissim mersí a omnes! BdO.

A nor colaboratores!

Noi recivet tam mult articules valorosi e mem poemas, que li micri cadre de nor bulletin absolutmen ne sufice inbrassar ti vast materiale. Ergo, ples pardonar. C.Dr.Stastny va responder per privat lettres a sres: prof. Dr. Sommer-Batek, Josef Stádler / Bulteno de la laborista ligo Esperantista / in Plzen. Red.

Tisk: St. Fechtner & spol., Praha-1.195. -- Odpovedny redaktor: Jos. Svec, Praha-VII., Skroupova 2.